Mulakaat.....Ek Ajnabi Dost se !

Kuch ajnabi rishte bhi kitne apne lagte hain, maano janmon ka naata ho,

Na jaan na pehchaan, phir bhi dil mil jaate hain, maano usi ka intezaar ho.

Mili mujhko bhi ek aisi hi ajnabi, jise shayad main bhool paungi na kabhi.

Baat yeh kuch saal pehle ki hi sahi, par lagta hai jaise hua hai yeh bas abhi abhi.

Khadi thi main Mumbai ke railway station par,

Thaki haari, bhooki pyaasi, bas apna imtehaan de kar.

Purse mein paise to the, par akele khaane ki aadat na thi,

Intezaar kar rahi thi ek dost ka, jiske aane ki ab koi ummeed na thi.

Itne mein ek pyaari si ladki, aakhadi hui mere baaju mein,

Dikhne mein thi seedhi saadhi, bas ek bag tha haathon mein.

Yeh to yaad nahin ki baat shuru kahan se hui,

par us thode se samay mein hum mei kai saari baatein hui.

Dekhte hi dekhte aagayi railgaadi hamari,

Dhakka mukki mein hum chad gaye sawari.

Khade khade railgaadi mein, meri bhook aur badh gayi,

Rok na paayi main khud ko, aur us ladki se keh gayi...

"Yaar, zoron ki bhook lagi hai mujhe ab,

jaane ghar pahunch kar main kha paungi kab !"

Yeh sunkar ajnabi woh dukhi ho gayi,

Kehne lagi,"Mujhse bahut badi galti ho gayi...

Liya tha 'Wada Pav' maine station se apne liye,

Kha gayi main use, kash bachaya hota aapke liye"

Sun kar uski yeh baat main tajjub mein pad gayi,

Us choti si pyaari si ajnabi ko main bas dekhti hi reh gayi.

Utne mein us ne apna bag khola,

Aur usmein se ek chota sa bottle nikala.

Kehne lagi,"Thoda sa pani pee lo,

is se apni bhook thodi si kam kar lo"

Par bhook to meri kab ki mit chuki thi uski baaton se,

Pet to mera kab ka bhar chuka tha, uski insaaniyat se.

Suna tha maine ki har insaan mein kahin ek Bhagwaan hota hai,

Us din yeh mehsoos kiya, ki har insaan, kahin na kahin, apna hota hai.

Apnapan dikhane ki der hai, Pyaar jataane ki der hai,

Duniyan mein har koi ek dost hai, bas haath badhane ki der hai !

To chaliye mita de is 'doori' aur 'deri' ko, kyon ki,

Zarurat hai roushni laane ki, jahan jahan andher hai !